Romsdal

Update Required To play the media you will need to either update your browser to a recent version or update your Flash plugin.

Bygd: Romsdal
Tekst: Nerheim, Konrad
Melodi: Sjå no er det dag /Karl Svensen
Kjelde: Unge Romsdal 1932 s. 33

Konrad Nerheim (1897-1965) var fødd i Tresfjorden. Han starta tidleg eigen handelsskule i Ørsta, seinare i Molde og sidan flytta han til Minde i Bergen. Under krigen dreiv han illegalt arbeid. Han blei arrestert, men slepte fri etter ei tid ved å spele sinnsjuk. Seinare rømde han til Sverige. Om dette utga han boka: Komedie med Gestapo, Varde forlag, 1947. Etter krigen engasjerte Nerheim seg i avis- og forlagsbransjen. Han leia drifta av avisa "Gula Tidend" og var aktiv medlem av "Norsk Måldyrkingslag" i ei årrekke."

Sjå fjellgarden høg med urer og flær,

med Hornet og Vengjatind.

Sjå fjorden med øyar, holmar og skjer,

og havgar’n i vestanvind.

Frå Aursjø i aust til Harøy i vest,

frå Rekdal i sud til Hustad og Bud

me haustar av strev som fedrar oss gav

ei signing på land og hav.

Um Vika i mørker frådar mot land,

enn longt blinkar Ona fyr.

Or havet gjev Gud oss rikdom i hand,

men stundom vert fengdi dyr.

Når sjøen gjeng høg med skavlar og brot

og heimfolket ligg i bøn og i gråt,

på tilja stend dølen, roleg og hag

og strir i det ville jag.

Kong Nokve mot Harald Hårfager fall

i strid for sitt fagre land.

Men endå um Veøy kongsgard er all,

der møtast båd bygd og strand.

Og krev gamle Noreg endå vårt blod,

me stend liksom Per og Dreyer dei stod

og hugheilt med gjev båd hjarta og hand

for deg, du vårt gjeve land.

Me elskar deg Romsdal, du er den stad

som fyllte vårt sinn, vår hug.

Du nørde vårt mod og gjorde oss glad

og auka vår dygd og dug.

Me ærar vår arv og krever din rett,

og bløma du skal frå ætt og til ætt,

so lenge som Rauma fossar mot fjord,

me odlar vår fedrajord.